1) Biccai
Già l’as fata Piredda s’atrivida
a seguzare su talentu meu,
e ca po nudda timo s’impeleu
como so’ prontu, atzeto cust’isfida
Cun versu bellu, cun rima pulida
comente in palcu mi nde peso reu.
De su Marghine canto sos talentos,
ma cale sunt sos tuos argumentos?

2) Piredda
Biccai talentosu rimadore
de chirru otzidentale marghinesu
a disafiu b'as leadu avesu
e ti connoschent che a gherradore
Ma a s'atza mia no li dias pesu
e pensa a acuntentare su letore
Cun argumentos e cun disaogu
ponimus paris Marghine e Meilogu

3) Biccai
Su Marghine l’istimo e lu difendo
cun bon’aficu e cun su coro in manu
ca in s’isula nostra che sovranu
cumparet e po issu già m’ispendo,
dae Punta Palai bolo e rendo
omagiu a baltos montes e pianu.
Pienas de incantu sunt sas biddas,
b’at bellas feminas, bonas pobiddas

4) Piredda
Non ti bastat su versu fatu a bolu
che a s'astore tue cheres bolare
ma tando non ti leet su disconsolu
cando Campeda nch'as a barigare:
froridas biddas as a ammirare
e finas medievale bidditzolu.
Pantasima b'agatas de Donoria
femina bella ma no apas timoria

5) Biccai
Sa Campeda mentovas ma t’amento
chi la tenimos nois in costou,
ti ’antas meda su terrinu tou
ma deo un’ ebbia ti nd’assento,
soe seguru e certu non mi pento,
mancari siat grae che su tzou:
est menzus a sa sola Macumere
de totu sas biddas ch’as in podere!

6) Piredda
Chirchende casus belli a corfu sicu
ses aterrende como rasu rasu
E tando ti rispondo sena pasu
dendedi in custa otava un'indicu
Ca ischimus: capitale de su casu
est Tiesi, e tue non bi ponzas bicu!
Si cheres ammaniare una rebota
canta nde cheres ti lassamus giota!

7) Biccai
A su pè bistes gai isala isala
sos arrejonos tuos balent pagu.
Non poto intender mancu su fiagu
de su latte chi cazas a cuss’ala.
ca mi faghet luego a gana mala,
non tenzo ne gosu ne disvagu
In su Marghine terra ben’ondrada
finas sa giota bessit prelibada!

8) Piredda
Mancari prelibada no andat bene:
atera cosa meressent sas musas!
Dendeli giota tue ti nd'abusas
...e beniminde abba de Ipocrene!
Pro cussu tue poetende acusas
e narrer ti lu lassas dae mene:
sas musas in Bonolva o Romana
chi bufent finas a cantu nd'ant gana!

9) Biccai
Chimbant’annos in palcu est Marieddu
dende onores a sa Sardigna intrea.
Vasco cun Murgia setzint sa cadrea
de mastros in poeticu faeddu.
Su Marghine si mèritat s’aneddu,
o Piredda non nd’as mancu s’idea.
Mortos de Meilogu sunt sos mannos,
ma como bi ses tue a fagher dannos!

10) Piredda
Marieddu cussas abbas at bufadu:
est de “s'iscuderia” 'e tiu Barore
Mira, su banaresu gherradore
de sos eternos ghiat su senadu:
boghende puntos est determinadu
a chie no faeddat a tenore.
Ammenta, nd'amus Anghelos in terra:
Porcheddu e Fadda. No li fetas gherra!

...sighit...