A su Presidente 'e su cossizu
Contro sa zente anziana
Sa manovra Renziana

Nara chi sa manovra a preparadu
su presidente nou'e su cossizu
a d'onzi mama chi ada unu fizzu
ottant'euros beni regaladoso

So siguru chi Renzi est manovradu
su partidu poitte non si abbiza
s'incassat euros norantamizza
cheret narres no este ispiantadu

Ma sicomente Renzi est obbligadu
devede ascurtare cussa zente
si cherede addurare presidente
o puru enidi de nou cambiadu

Monti s'Italianu a rapinadu
po salvare una banca in sa Toscana
arruinande sa zente anziana
su piùs miseru pensionadu

Subitu Letta ana nominadu
a occupare sa manna poltrona
però no nde faghiada una ona
in pagu tempus che l'ana cazzadu

Tando Renzi nde ada approfittadu
presidente ses nominadu issu
minettande chi su postu fissu
che deved'esser già ismentigadu

Solu issu chi siada occupadu
comente Presidente o Senadore
bella fida si faghede de signore
sind'affutti de su precariadu

Poberos fessos chi l'ana votadu
e ancora li dades importanzia
Renzi no est omine 'e sustanzia
ca troppu a su riccu est'attaccadu

S'istat bonu aiat cominzadu
a donz'unu a lassare unu salariu
occupadu l'aiat su precariu
e deo puru t'aiat votadu

Ma non ti ses però preoccupadu
de una mama chi ha tantos fizzos
cun su famene in domo fin'a chizzos
e su maridu est disoccupadu

Ottant'euros as'istanziadu
chie a s'annu nd'at norantamizza
pro aer solu in doma una fizza
narami Renzi si appo isbagliadu

Si deo ti aia cossizadu
e a mie aias postu mente
su siguru chi tue presidente
po tottu fida bi fisi adduradu