Sighint sa crònacas eletorales cara a sa presentatzione de sas listas. S'ùrtima nova interessat sos 5 Isteddos. Roberto Lardieri, unu de sos militantes prus serentes a su cabu mannu de su movimentu, Beppe Grillo, at naradu chi su M5S «non s'at a presentare a sas imbenientes regionales». Sas brigas in intro su movimentu ant giutu a custa detzisione. Pro custu «Grillo no at a cuntzèdere su sìmbulu a nemos».

Sighit in s'interi sa pelea de Sardegna Possibile e de su Fronte indipendentista unidu pro sa regorta de sas firmas netzessàrias a cuncùrrere a sas eletziones. Firmas chi su M5S no aiat dèvidu chircare s'incasu àeret atzetadu sa proposta de unu cussigeri sardista (Giuanne Pia) de aderire a manera tècnica a sa chedda de Grillo. Difatis, sa presèntzia de unu cussigeri, isvìnculat cale si siat partidu o movimentu dae custa pràtica. Ma si su M5S no at postu mente a su cussigeri sardista (de seguru sa cosa diat àere aumentadu sas brigas), sa matessi tàtica est bistada posta in òpera dae su guvernadore Cappellacci chi at aderidu a sos “zonafranchistas” de Maria Rosària Randaccio sighende, però, a abarrare in Forza Italia.

Su Movimentu Zona Franca chi non si reconnoschet in sas positziones de Randaccio at a candidare a guvernadore Luisi Sanna, giai cussigeri comunale (dae su 1981 a su 1995) e vitze sìndigu (dae su 1989 a su 1990) de Aristanis In sas oras imbenientes amus a àere si nùmene de su candidadu de sa coalitzione de tzentru manca.

In sas oras imbenientes amus a àere si nùmene de su candidadu de sa coalitzione de tzentru manca. E finas sos sèberos de su Psd'Az, de Irs e de Sardigna natzione.