Amigu caru e mi fis bighinu,
mi dispiaghet chi nos as lassadu.
Compare 'e Ozzu Santu Pietrinu,
dae sa die chi ti ses cozzadu.
Distimonzu chirradu ti asa a Ginu,
a s'altare t'appo accumpanzadu.
Ma non creia mai e t'aer bidu,
intro cussu baule fioridu.

In su baranta cando ses naschidu,
fis su tesoro de babbu e de mama.
Sos augurios tanto asa rezzidu,
de vida longa de forza e de fama.
Medas gherrande a punzos t'ana idu,
subra su ring cun onore e brama.
E non timia nessunu Careddu,
finas zughinde carch'ogru nieddu.

Iniziadu ada giovaneddu,
su millenoighentoschimbantotto.
Battordigh'annos tenia Pireddu,
Pietrinu nd'aiada degheotto.
Allenadore Mutzette Antoneddu,
fis sa palestra in d'unu viotto.
Nominada l'aiana Grotta Azzurra,
inie nos daimis onzi surra.

Certu non fimis zogande a sa murra,
ma lu faghimis pro allenamentu.
Dae Casteddu finas a sa Nurra,
non cramaian pro combattimentu.
Mancu passande in logu'e saurra,
nos infundiat gai onz'indumentu.
Ma si allenamentu non faghias
unu anzu 'e siguru regollias.

Pietrinu affrontadu at medas bias,
punzos da cappaò e istrampadas.
Ma sun peus sas bruttas maladia,
chi non benini mai superadas.
Si cussu male nos girada in tundu,
andamos tottu a s'atteru mundu.
Faghe su piagherePietrinu,
saluda Mamma Babbu e Carmelinu.