A MASTRU PASCALE CHERCHI
Apena sa campana ada sonadu
in su zilleri pietrificados
sos amigos si sunu abbaidados
nande Pascale como est'ispiradu
Su male chi zughias attaccadu
est bruttu non perdonada a nessunu
però Pascale tue a settant'unu
so cuntentu bi sias arrivadu
Bi 'ndat pius de unu isfortunadu
chi cussu male l'ha leadu inta
si che 'ndat mortu a vinti e a trinta
e sa vida puru han terminadu
Tue Pascale non sese mancadu
l'ischis sa morte chi bi la deppimos
e nois puru tantu che sighimos
a ue tue già che ses andadu
Muzzere e fizzos como asa lassadu
so seguru nde sunu addolorados
ma sunu mannos e istudiados
c'has tentu in sa vida coidadu
Medas su babbu lis este mancadu
sende minores ancora in munteddos
a che los faghere giovanos piseddos
sa mama 'e seguru ada tribaladu
Bi cherede forza 'e coro e de cherbeddos
affrontare simile dolore
però cando avvisa su Signore
andamos tottu biancos nieddos
Dae su poeta 'e sos Pireddos
rezi unu saludu calorosu
drommi cuntentu e bonu riposu.