Si ais gana de bos bìdere protagonistas de un'istoriedda disignada in ue faeddare pro mèdiu de nueddas podides finire de bisare, ca cun pagos passàgios nde podides creare una, deretos, cun s'elaboradore o cun telefoneddos multimediales e taulitas (Apple e Android). A pustis de àere iscarrigadu s'aplicatzione Bitstrips dae su situ ufitziale (ma finas tràmite Facebook) podides comintzare a creare s'immàgine chi cherides bos rapresentet in sas istorieddas. Seis pili-curtzos o pili-longos? Làngios o grassos? Artos o bassos? Non b'at perunu problema, podides creare s'omineddu (avatar) a segunda de sas caraterìsticas bostras. Ma bi podides annànghere finas ispijitos, mustatzos, barba, bonetes, e seberare sas botas e unos cantos tipos de bestimentas. Proade-bi, ais a bìdere chi bos assimigiades meda. Fatu custu passàgiu seberade una iscena intre sas chi nos cumparent die cun die e intre àteras partzidas in distintas categorias (umore, situatziones, annùntzios). In prus seberades si cumpàrrere solos o in cumpangia de carchi amigu bostru e, si non bos bastat sa didascalia, faghide faeddare sos personàgios pro mèdiu de sa nuedda. Pro finire in bellesa podides cumpartzire s'istoriedda in Facebook. Creada dae unos cantos pitzocos canadesos in su 2012, in giru de pagu tempus s'aplicatzione Bitstrips est divènnida populare meda intre sos impitadores de sa rete sotziale, mescamente in Facebook. E ammentade-bos chi nemos bos impedit de impitare su sardu!